BMW-ს ისტორიული, საკულტო მოდელი

კუპე BMW M1 გამორჩეული ავტომობილია. თავის დროზე, ის მხოლოდ 453 ცალი დამზადდა და მათ შორისაც არის გამორჩეული ეგზემპლარები.

BMW M1 Procar გერმანული კომპანიის მოტორსპორტის შტომ შეიმუშავა. რა თქმა უნდა, დანიშნულება რბოლებში მონაწილეობა იყო. შეიქმნა სპეციალური სერია, რომლის ეტაპებიც, ფორმულა 1-ის ევროპული რბოლების თანმდევ რბოლებად ტარდებოდა. მათში F1-ის, სპორტული პროტოტიპების და ტურინგის კლასის საუკეთესო პილოტები ეჯიბრებოდნენ ერთმანეთს.

პირველი სეზონი (1979 წელს) ნიკი ლაუდამ მოიგო, მომდევნო - ნელსონ პიკემ.

სწორედ ერთ-ერთი ასეთი ავტომობილი წარსდგა პებლ ბიჩში (მონტერეი, კალიფორნია) გამართულ ელეგანტურობის ტრადიციულ ფესტივალზე, სადაც

BMW-მ თავისი უახლესი კონცეპტუალური როდსტერით, Z4-ით მიიპყრო ყურადღება.

Auto Bild

სულ 40 ცალი „პროქარი“ შეიქმნა, რომლებიც მხოლოდ რბოლებისთვის იყო განკუთვნილი.

ის ეგზემპლარი კი, რომელიც პებლ ბიჩში წარადგინეს, ერთადერთია. საქმე ისაა, რომ მას საერთო სარგებლობის გზებზე მოძრაობის სერტიფიკატიც გააჩნია. ესეც იმიტომ, რომ მისმა მფლობელმა ამაზე სარბოლო სერიის გაუქმების შემდეგ იზრუნა. ოღონდ, ავტომობილს შეუნარჩუნდა სარბოლო უკანა ანტიფრთა, აეროდინამიკური ელემენტები და ბორბლების განიერი თაღები. სამაგიეროდ, სალონში სარბოლო ყაიდის სავარძლები, სამოქალაქო დანიშნულების, უფრო კომფორტულებმა შეცვალა. თანაც ისინი ტყავითაა გაწყობილი.

Auto Bild