მერსედესის იშვიათი კუპე, რომლის შესახებ ბევრმა არაფერი იცის

ამ ავტომობილის შესახებ, შესაძლოა, გერმანული კომპანიის ბევრ თავგამოდებულ ფანსაც არაფერი სმენია. ის მართლაც იშვიათი ქმნილებაა, რომლის სტილიც თვით „პინინფარინამ“ შეიმუშავა. და როგორც ირკვევა, ლეგენდარული იტალიური ატელიეს შემდგომ განვითარებაში, ამ კუპეს დიდი გავლენა მოუხდენია.

რატომღაც, „მერსედეს-ბენც 300 SEL 6.3 პინინფარინა კუპეს“ შესახებ ინფორმაცია არც შტუტგარტელთა ონლაინ მონაცემთა ბაზაშია და იტალიურ ატელიესაც თავის არქივში მისი მხოლოდ ერთი ფოტო აქვს შემონახული. 1970 წელს შექმნილი ეს კუპე ამჟამად ერთადერთ ეგზემპლარად არსებობს და ის ჰოლანდიელს ეკუთვნის. სწორდ მისი დამსახურებაა, რომ ასეთი ავტომობილი არსებობს.

Auto Bild

► იმ

დროს „მერსედესი“ ამ კლასის კუპეს არ აწარმოებდა.

ერთ ჰოლანდიელს (მისი ვინაობის გამხელა ოჯახმა არ ისურვა) გერმანული კომპანიისთვის მიუმართავს და მისთვის 1969 წელს გამოშვებულ სედან 300 SEL 6.3-ის ბაზაზე, კუპეს დამზადება უთხოვია, რაზეც უარი მიიღო. ისიც ადგა და თავისი ახალთახალი ავტომობილი „პინინფარინას“ მიუყვანა იგივე თხოვნით. და სერჯო პინინფარინასგან თანხმობა მიიღო.

Auto Bild

დიზაინერებმა ბორბლებს შორის ბაზა, ბორბლების კვალის სიგანე, სიგრძე და ავტომობილის წინა კარების სიმაღლე უცვლელად დატოვეს. სამაგიეროდ გადააკეთეს რადიატორი და საქარე შუშა. შეიცვალა წინა საყრდენების დახრის კუთხე, სახურავი თავიდან დაამზადეს (ხელით, ფოლადსგან - მაშინ სად იყო კარბონის

კომპოზიტი). შეიცვალა კაპოტი, საბარგული, ფრთსხმულობა, ბამპერები. ორივე დარჩენილი კარი დააგრძელეს. მრგვალი, ვერტიკალურად განლაგებული ფარები პლასტიკატის შავ ჩარჩოში მოათავსეს, თუმცა ახლანდელმა მფლობელმა შავი ჩარჩო ქრომირებულით შეცვალა.

Auto Bild

თვითონ სედანი, რომლის შემუშავებაშიც AMG-ს სპეციალისტებსაც მიუღიათ მონაწილეობა (რაც პირცველი შემთხვევა იყო), 6.3-ლიტრიანი V8 ძრავით იყო აღჭურვილი, რომელიც 300 ცხენის ძალას და 588 ნიუტონმეტრს გამოიმუშავებდა - იმ დროისთვის ეს შესაშური მაჩვენებლები იყო. ძრავთან წყვილში 4-საფეხურიანი ავტომტური კოლოფი მუშაობდა. შემკვეთს ავტომობილის გადაკეთება დაახლოებით 100 000 დოლარი დაუჯდა, რაც ახლანდელი კურსით ნახევარ მილიონს აღწევს.

Auto Bild

პირველმა მფლობელმა ავტომობილი 1970-იანების ბოლოს გაყიდა. მას დაახლოებით 65 000 კილომეტრი ჰქონდა გავლილი. ახლანდელი მფლობელის ხელში, კუპემ მხოლოდ 6 500 კილომეტრი დაამატა.

► საინტერესოა, რომ „პინინფარინამ“ 1975 წელს „როლს-როისისთვის“ მოდელი Rolls-Royce Camargue შეიმუშავა, რომლის სილუეტიც ძლიერ ჰგავს იმ ერთჯერადი კუპესას, რომელზეც ახლა გიამბეთ...

Auto Bild