გავიხსენოთ 90-იანი წლები - როცა საქართველოში მერსედესი ან BMW ფუფუნება იყო

არა, ამ სტატიაში უშუქობაზე, უგაზობაზე, ნავთისა და პურის რიგებზე, ტალონებზე, კუპონებზე ან სამოქალაქო ომზე ლაპარაკს არ ვაპირებთ. უბრალოდ გვინდა, გავიხსენოთ და გაგახსენოთ ის გამორჩეული ავტომობილები, რომლებიც 90-იან წლებში ”მოღვაწეობდნენ”. ქართველმა მძღოლებმა კი, ეს მანქანები, რა თქმა უნდა, გაცილებით გვიან აღმოვაჩინეთ. 90-იანებში ჩვენთან ”მერსედესი” ან BMW ფუფუნება იყო. ამ ჩამონათვალში, რა თქმა უნდა, უამრავი 90-იანელი მოდელი ვერ მოხვდა, მაგრამ ვინც მოხვდა, ნამდვილად გამოირჩეოდა.

Mercedes-Benz S-კლასი (W 140)

ეს იყო გერმანული, კერძოდ კი შვაბური ინჟინერიის ხელოვნების ნიმუში, რომელიც მერსედესმა 1991 წელს წარმოადგინა. იმ

დროისთვის ტექნიკურად ამაზე უკეთესი ავტომობილის შექმნა შეუძლებელი გახლდათ. მეტიც: ასეთი სრულყოფილი ავტომობილი ფაქტობრივად არც არსებობდა. ”კანცლერის კლასი” - აი, ეს იყო ამ მერსედესის მეტსახელი.

BMW M3 (E36)

1992 წლიდან ბავარიელებმა ყველაზე მაგარ ”მესამე სერიას” ისევ M3 დაარქვეს. E36 დღემდე BMW-ს მოყვარულების (და არა მარტო) ერთ-ერთი უსაყვარლესი ავტომობილია. მისი ძლიერი 3-ლიტრიანი და 6-ცილინდრიანი ძრაცა 286 ცხენის ძალით გამოირჩეოდა.

Renault Twingo

”S-კლასი”, M3 და ახლა ”ტვინგო”? გეთანხმებით, უცნაური გადასვლაა, მაგრამ ”ტვინგომ”, რომელსაც დამცინავად უყურებთ, მაშინ მთელი ევროპა აალაპარაკა. ”რენო ტვინგო” 1992 წელს გამოვიდა და მაშინვე შეეძლო ის,

რასაც დღეს Fiat 500 ახერხებს - ოღონდ, რეტროს გარეშე. ჩვენი გერმანელი კოლეგები წერენ, ”ტვინგომ” მაშინ ყველას გული მოიგო და გაუთბოო. პატარა ფრანგი, რა თქმა უნდა, განსაკუთრებით ქალბატონებს მოსწონდათ. ისევე, როგორც დღეს Fiat 500.

Porsche 911 (993)

წავედით ისევ სპორტში. უკანასკნელი 911 ჰაერგაგრილების ძრავით. ”პორშემ” ამ მოდელში მეტი აქცენტი გააკეთა იმაზე, რომ მანქანა ყოველდღიური მოხმარებისთვის გამომდგარიყო. დიზაინერმა ლაგააიმ კლასიკური 911-ის უმტკივნეულოდ მოდერნიზება მოახერხა. 3,6-ლიტრიან ბოქსერს საბაზო ”კარერაში” თავიდან 272 ცხენის ძალა ჰქონდა.

Toyota Supra

330-ცხენისძალიანი იაპონური სპორტული ავტომობილი უფრო მეტი იყო, ვიდრე უბრალოდ The Fast and the Furious. თუკი დავივიწყებთ მიუწვდომელ Lexus LFA-ს, ”სუპრა” უკანასკნელი ”ტოიოტა” იყო, რომელიც ”პორშეს” და კომპანიას ტოლსწორად დაუდგებოდა.

Opel Calibra

უკანასკნელი ”ოპელი”, რომელიც ავტომოყვარულებს გულისცემას უჩქარდებდა. ”მანტას” შვილს ”კალიბრა” დაარქვეს და ეს მანქანა განსაკუთრებით 2.0 Turbo 4x4-ის სახით მოგვწონდა. ანუ, 204 ცხენის ძალით და სრული ამძრავით. კარგ მდგომარეობაში მყოფი ”კალიბრა” დღეს ძალიან იშვიათია და საკულტო ეგზემპლარი გახდება.

Chevrolet Corvette ZR-1

დიახ, 80-იანი წლების შვილი უფროა, მაგრამ მაინც. მეოთხე თაობა თავიდან სუსტი იყო და მხოლოდ 1989 წლიდან გამოუშვეს გადასარევი ვარიანტი. ალუმინის ძრავის მქონე ZR-1-ს 375-დან 405 ცხენის ძალამდე სიმძლავრე ჰქონდა და 290 კმ/სთ-ს ავითარებდა.

Alfa Romeo 156

156-ის უკანა კარის სახელურები C-საყრდენში ჩამალეს. გარდა ამისა, ”ალფას” კლასიკური ცხაურა, გულის ფორმის ”სკუდეტო” ისევ წინა პლანზე წამოწიეს. თამამად შეიძლება ითქვას, რომ Alfa Romeo 156 90-იანი წლების ერთ-ერთი ულამაზესი სედანია.

BMW M5 (E34)

სპორტული სედანების ერთ-ერთი საუკეთესო წარმომადგენელი, რომელსაც იმ დროს ყველა ის უპირატესობაც ჰქონდა, რითაც ჩვეულებრივი მეხუთე სერია გამოირჩეოდა. თანაც, ბავარიელები მეორე M5-ს უნივერსალის სახითაც უშვებდნენ.

Lamborghini Diablo

როდესაც Countach-ის შემცვლელი დააანონსეს, იტალიელებმა განაცხადეს, ეს მსოფლიოში ყველაზე სწრაფი სერიული ავტომობილი იქნებაო. ”დიაბლო” 1990 წელს გამოვიდა და 492-ცხენისძალიანი ძრავით 328 კმ/სთ-ს ავითარებდა. მისია შესრულდა. დიზაინი Miura-ს მხატვრის, მარჩელო განდინის შექმნილია.

Audi TT

Audi TT-ს დიზაინი თავიდანვე მეხის გავარდნასავით იყო. დიდი თუ პატარა ამ მანქანაზე ლაპარაკობდა. სპორტული დიზაინი ყველას მოსწონდა, განსაკუთრებით კი ახალგაზრდებს და ახალგაზრდა ქალბატონებს.

Mazda RX-7

RX-7-ს 280 ტურბო-ცხენის ძალები ჰქონდა და ეს იყო ტექნიკური მწვერვალი ”მაზდას” ისტორიაში. ის ფაქტი, რომ ევროპაში ბევრმა არ იყიდა, ალბათ უფრო მაღალი ფასის ბრალია.

Buick Park Avenue

ვიზუალურად ტიპიური ამერიკელი, ტექნიკითა და მიდგომით ოდნავ შეცვლილი. ამ ავტომობილს უკვე წინა ამძრავი ჰქონდა. გარდა ამისა, 8-ცილინდრიანზე უარი თქვეს და 3,8-ლიტრიანი V6 ძრავა ჩაუდგეს. რაც მთავარია, მისი ძრავა 300 000 კილომეტრის გავლის შემდეგაც კი ჯანმრთელი რჩებოდა.

Nissan 300ZX

განსაკუთრებით კარგი იყო Twin Turbo-ვერსია - 283 ცხენის ძალით და მექანიკური გადაცემათა კოლოფით. ამ მანქანაში გაერთიანებულია სიმძლავრე, 90-იანი წლების შესანიშნავი დიზაინი და ყოველდღიური მოხმარებისთვის საჭირო თვისებები. თუ ეს ავტომობილი თქვენს ფარეხში დგას, ჩათვალეთ, რომ კლასიკა გყავთ.

Dodge Viper

ამ გრანდიოზული მოდელის შექმნაში თვით კეროლ შელბი მონაწილეობდა. სწორედ მისი გადაწყვეტილება იყო 10-ცილინდრიანიც. გრანდიოზული არა მარტო 394-ცხენისძალიანი სიმძლავრეა, არამედ, პირველ რიგში ძრავის 8-ლიტრიანი მოცულობა.

Honda Civic Type R

უფრო ხისტი, უფრო დინამიკური, უფრო სწრაფი - სამწუხაროდ, ”ჰონდა” ”სივიკის” Type R ვერსიას მხოლოდ იაპონიაში ყიდდა. 185 ცხენის ძალა 8200 ბრუნზე - ეს უმძლავრესი ჰეჩბექი GTI-ს ქილერი გახლდათ, სერიულად ჰქონდა Recaro-ს სავარძლები და Momo-ს საჭე.

Mercedes-Benz 500E

საუკეთესო, ან არაფერი. ამ შემთხვევაში ორი საუკეთესო სამყაროს შვილი მივიღეთ, რადგან მძლავრი სედანი 500 E ”პორშესთან” თანამშრომლობის ფარგლებში შეიქმნა. 326 ცხენის ძალის წყალობით 8-ცილინდრიანი ძრავის მქონე სედანი 100 კმ/სთ-მდე 6,1 წამში ჩქარდება.

Hummer H1

High Mobility Multipurpose Wheeled Vehicle, მოკლედ, Humvee - ეს მანქანა 1991 წელს მილიონობით ადამიანმა ტელევიზორში ნახა და მოიწონა. ერთი წლის შემდეგ კი, AM General-მა მისი ცივილური ვერსიაც გამოუშვა - ასე დაიბადა Hummer H1.

Jaguar XJ

წინამორბედი XJ40 თავისი დებიუტის დროს, ”იაგუარის” კვალობაზე ძალიან პროგრესული იყო, 1995 წელს კი ბრიტანელები X300-ის შემთხვევაში საქმეს კიდევ უფრო ფრთხილად მიუდგნენ. ძირეულად ახლებურად შექმნილი Jaguar XJ 2003 წლიდან გამოვიდა.

Honda NSX

80-იანი წლების მიწურუს ”ჰონდაში” გადაწყვიტეს, რომ უკვე დრო იყო, შეექმნათ მანქანა, რომელიც ამ მარკის ტექნიკურ კომპეტენციას მთელ მსოფლიოს დაუმტკიცებდა. Honda NSX-ს აირტონ სენას სული მოყვება! მის 3-ლიტრიან V6-ს 276 ცხენის ძალა აქვს.

BMW Z3 Coupe

ბევრი მას სპორტულ ფეხსაცმელს უწოდებდა. ამ მანქანაში 321 ცხენის ძალა ღვთის წყალობაა! ეს არის ავტომობილი, რომელიც BMW-ს მოყვარულებს ძალიან უყვართ, სხვები კი - მინიმუმ აფასებენ.

McLaren F1

370 კმ/სთ ერთ წამში 103 მეტრს ნიშნავს. 90-იანი წლების შუაში McLaren F1-ზე სწრაფი მანქანა არ არსებობდა. სუპერსპორტული ”მაკლარენის” 12-ცილინდრიანი ძრავა, რომელსაც 600 ცხენის ძალა აქვს, BMW-ს შემუშავებულია.

იხილეთ ფოტოგალერეა:
40 მანქანა, რომელიც აუცილებლად უნდა გიყვარდეს!