ფერარის ლეგენდარული მოდელი 30 წლისაა

„ფერარის“ ერთ-ერთ ყველაზე გამორჩეულ ავტომობილს, F40-ს გამოშვებიდან 30 წელი შეუსრულდა.

მისი პირველი ეგზემპლარი მარანელოში 1987 წლის 21 ივლისს გამოუშვეს. ავტომობილი კომპანიის დაარსებიდან 40 წლის იუბილეს მიეძღვნა. დღეს ის უკვე კლასიკური ავტომობილების ელიტარული კასტის წევრი გახდა.

„ფერარი F40“ შუაძრავიანი, უკანაამძრავიანი სუპერავტომობილია, რომლის წარმოებაც მხოლოდ ხუთი წელი გაგრძელდა.

თუმცა, სარბოლო LM და GTE ვერსიების გამოშვება (შესაბამისად) 1994 და 1996 წლებამდე გაგრძელდა.

Auto Bild

ავტომობილი აღჭურვილია 3.0-ლიტრიანი V8 ძრავით, რომელიც წყვილი ტურბო კომპრესორის დახმარებით, 478 ცხენის ძალას ავითარებს. ეს აგრეგატი მოდელ „288 GTO ევოლუციონეს“ ძრავის გაუმჯობესებული

ვარიანტია. მისი მეშვეობით, F40 გახდა მარანელოელთა პირველი საგზაო ავტომობილი, რომლის სიჩქარეც 320 კმ/სთ-ზე მეტი იყო. „ფერარის“ სპეციალური პროექტების შეფი ერმანო ბონფიჯოლი ამბობს, რომ ამის მიღწევაში ინჟინრებს არაერთი სიახლის დანერგვა დაეხმარა.

„ჩვენ განსაკუთრებული ყურადღება ძრავის წონის შემცირებას დავუთმეთ. ამაში მაგნიუმის შენადნობების ინტენსიური გამოყენება დაგვეხმარა. ამ მასალით ზეთის კარტერი, ცილინდრების თავის ხუფი და შემშვები კოლექტორი, ასევე გადაცემათა კოლოფის სამაგრები დავამზადეთ. მაგნიუმის შენადნობი ალუმინისაზე დაახლოებით ხუთჯერ მეტი ღირდა და მანამდე ეს მასალა ამ რაოდენობით საგზაო ავტომობილებზე არავის გამოუყენებია“, - ყვება ბონფიჯოლი.

Auto Bild

„პინინფარინას“ ყოფილი დიზაინერი ლეონარდო ფიორავანტი ამბობს, რომ

F40-ის სტილი, ავტომობილის გამორჩეული ტექნიკური აღჭურვილობის გარეგნული ასახვაა. ის აერთიანებს სიჩქარეს და უსაზღვრო შესაძლებლობებს.

Auto Bild

ტესტმრბოლი დარიო ბენუცი კი დასძენს, რომ პირველი პროტოტიპები ძნელი სამართავი იყო: „მძლავრი ძრავის მოსათვინიერებლად, მანქანა თითქმის ყველა ასპექტში გადასაკეთებელი გახდა. ამას კი უამრავი ტესტი დასჭირდა. საჭირო იყო როგორც ტურბოკომპრესორების, ასევე მუხრუჭების, საკიდარის, საბურავების და სხვა კვანძების სრულყოფა. საბოლოო პროდუქტი, შესანიშნავი აეროდინამიკით და მაღალ სიჩქარეზე სტაბილურობით იყო გამორჩეული. და ეს იმ დროს, როცა არც საჭეს და არც მუხრუჭებს, გამაძლიერებელი არ ჰქონდა და არც ელექტრონული დამხმარე სისტემები არსებობდა. ავტომობილის მართვა მძღოლის ოსტატობას და გამოცდილებას მოითხოვდა. საჭის მექანიზმი ზუსტი იყო, მანქანას გზა კარგად ეჭირა, მძლავრი მუხრუჭები სწრაფ შენელებას უზრუნველყოფდა. ამ ყველაფერთან ერთად, ძრავის სიმძლავრე, საგზაო ავტომობილს შეუდარებელ აჩქარებას ანიჭებდა“.

იხილეთ ფოტოგალერეა
Ferrari F40-ის დეტალური ფოტოები