კობრა ბრუნდება!

კომპანია AC Cars, რომელიც ადრე ბრიტანული იყო, აღდგენის შემდეგ კი გერმანული პასპორტი აქვს, მომავალი წლიდან სუპერავტომობილ „კობრას“ გამოშვებას განაახლებს. განახლებულ ავტომობილს სახელიც განახლებული ექნება. უფრო სწორედ, სახელს ინდექსი 378 დაემატება. ის გარეგნულად ძველ „კობრას“ დაემსგავსება და თანამედროვე აგრეგატით აღიჭურვება.

ამ ავტომობილის წარმოება შესაძლებელი გახადა „მცირე მოცულობით ავტომობილების მწარმოებელთა აქტმა“, რომელიც პატარა კომპანიებს იმის საშუალებას აძლევს, რომ ყოველგვარი ძვირადღირებული სერტიფიკაციის გარეშე, შეზღუდული ტირაჟით აწარმოონ ავტომობილები. ოღონდ, ამ ავტომობილის ორიგინალი უნდა იყოს მინიმუმ 25 წლის და მისი ძრავა გამონაბოლქვზე თანამედროვე მოთხოვნებს უნდა აკმაყოფილებდეს.

Auto Bild

ცნობისათვის, „კობრას“ წარმოება 1960-იან წლებში დაიწყო და თითქმის უცვლელი სახით, 1990-იანების შუა წლებამდე გაგრძელდა. განახლებული ავტომობილის სახელში რიცხვი 378, ძრავის მოცულობას (კუბურ დუიმებში) აღნიშნავს. მეტრული სისტემით, V8 ძრავის მოცულობა 6.2 ლიტრია. მყიდველს მას ორი ვერსიის სახით შესთავაზებენ. ერთი ატმოსფერულია და მისი სიმძლავრე 440 ცხენის ძალაა, მეორე კი მექანიკური დამჭირხნით არის აღჭურვილი და 550 ცხენის ძალას ავითარებს.

Auto Bild

AC Cars-ის ახალი მფლობელი ალან ლუბუნსკი ამბობს, რომ ახალი „კობრა 378“ მეოთხე თაობის მოდელის ბაზაზე აიგება და ის 100 000 გირვანქა სტერლინგზე ნაკლები ეღირება. მის ძრავას ელექტრონული სისტემა მოემსახურება,

ძრავასთან წყვილში კი თანამედროვე გადაცემათა კოლოფი იმუშავებს. გარდა ამისა, ავტომობილი საჭის გამაძლიერებლით და თანამედროვე სამუხრუჭე სისტემით აღიჭურვება. მის ეკიპირებაში კი, მყიდველის სურვილის შემთხვევაში, ჰაერის კონდიცირების სისტემაც შევა.

„ეს კვაზი-თანამედროვე ავტომობილია, რომელსაც ყოველდღიურად გამოიყენებთ. ის მნიშვნელოვნად გაუმჯობესდა, თუმცა შასი და ძირითადი კონსტრუქციული ნაწილები, ასევე ძარა - ისეთივე დარჩება, როგორიც ადრე იყო. მხოლოდ უფრო თანამედროვე მექანკურ აღჭურვილობას შეიძენს“, - ამბობს ლუბინსკი.

Auto Bild