იყო პირველი შენ საქმეში, ეს განსაკუთრებული უნარი და რჩეულთა ხვედრია. თავად მევლუდი ამბობს, რომ ამაზე არასდროს უფიქრია და არც მიზნად დაუსახავს - უბრალოდ, აკეთებდა და აკეთებს იმას, რაც ყოველთვის ყველაზე მეტად უყვარდა და ყველაზე კარგად გამოსდიოდა. ესაა მისთვის ყველაფერი, მთელი ცხოვრება, რომელშიც თავს იდეალურად გრძნობს.
რა გასაკვირია, რომ მევლუდ მელაძე მეუღლეს საქმემ შეახვედრა - სალომე გველესიანი ჟურნალისტია და ყველაფერი, რა თქმა უნდა, ინტერვიუთი დაიწყო.
ჟურნალის რედაქტორმა ჟურნალისტებს განუცხადა, რომ ინტერვიუ საავტომობილო თემაზე უნდა გაკეთებულიყო, რესპოდენტს კი ის ესტუმრებოდა, რომელსაც ეს თემა ყველაზე უკეთ ესმოდა. შემდეგ დაინტერესდა, იცოდა თუ არა ვინმემ, რა იყო პროტექტორი და როდესაც პასუხი სალომესგან მიიღო, დიდხანს აღარ უფიქრია - მევლუდთან სწორედ ის გაუშვა...
დღეს, სალომეს ქართული ავტოსპორტის სამყაროში მევლუდზე არანაკლებ იცნობენ, რადგან სწორედ მისი უშუალო ჩართულობით ტარდება რბოლები და იმართება სხვადასხვა ღონისძიებები. თავადაც შესანიშნავად მართავს მანქანას და ქალებს შორის გამართულ სამოყვარულო შეჯიბრებებშიც ხშირად მონაწილეობს.
მოკლედ, სალომესთვის ავტომობილი და ავტოსპორტი უცხო ნამდვილად არაა, აი ბავშვებს კი ნაკლებად გამოჰყვათ მანქანებისადმი სიყვარული. უცნაურია, მაგრამ ფაქტია, რომ ამ დიდ ოჯახში, ბავშვებიდან ავტომობილების მიმართ ინტერესს მხოლოდ გოგო, ლიკა იჩენს - მევლუდს ხშირად მიმართავს კითხვებით და სურს, რომ მართვა ისწავლოს, დანარჩენებს კი სულ სხვა ინტერესები აქვთ. უფროსი ბიჭი, ლუკა 20 წლისაა და მართვის მოწმობა მევლუდის დაძალებით აიღო. მანქანებისადმი ინტერესს არც 12 წლის ნიკა იჩენს, რომელიც ფეხბურთზე გიჟდება და არც ყველაზე უმცროსი, მაქსიმე, რომელიც ცხოველებთან მეგობრობს, განსაკუთრებით კი დინოზავრებისკენ მიილტვის. ნიკაზე ისიც ვთქვათ, რომ კომიქსებითაა გატაცებული და თვითონაც შესანიშნავად ხატავს.
მოკლედ, ავტომობილები მხოლოდ ლიკას აინტერესებს, მევლუდს კი სურს, რომ ამით დაკმაყოფილდეს და ავტოსპორტისკენ არ გადაიხაროს. მართალია, მანქანას ბევრი ქალი მართავს კარგად, მაგრამ ავტოსპორტი ცალკე თემაა. მევლუდის აზრით, ქალი ვერ აწევს იმხელა ტვირთს რისი აწევაც მამაკაცს შეუძლია, ავტოსპორტი კი სწორედ დიდი ტვირთია.
ბავშვობაში თვითონ მევლუდსაც სულ სხვა გატაცებები ჰქონდა და მისი არა მარტო ფიქრები, სიზმრებიც კი ავტომობილებს დასტრიალებდა. დღეს, ბავშვობის სიზმრების ცხადად ქცევა სურს და მიზნად მინიატურული, საბავშვო ქალაქის აშენება აქვს დასახული - ამ ქალაქში იქნება ყველაფერი, რაც რეალურ ქალაქშია, მოვლენები კი ავტომობილების გარშემო იტრიალებს: იქნება გზები, ბენზიგასამართი სადგურები, სამრეცხაოები და თუნდაც ხეები, სახლები, კაფეები თუ ბარები. ამ ქალაქში ბავშვები ივლიან, მართვის მოწმობას აიღებენ და თოთოეულ მათგანს თავისი ცხოვრება, თავისი ისტორია ექნება. მევლუდი ბავშვობაში სწორედ ასეთ ქალაქში ცხოვრებაზე ოცნებობდა, დღეს კი მინიატურული ქალაქის აშენება მისნაირი ბავშვებისთვის სურს.
მევლუდის კიდევ ერთი ოცნება და სურვილი ქართულ ავტოსპორტს უკავშირდება: აუცილებელია, რომ ავტოსპორტში საქართველოს ჩემპიონის სტატუსი უფრო პრესტიჟული გახდეს, ეს კი იმ შემთხვევაში მოხდება თუ სხვადასხვა კლასის გამარჯვებულები უცხოეთში გაემგზავრებიან და საერთაშორისო რბოლებში მიიღებენ მონაწილეობას. ეს უნდა იყის სისტემა და სტრუქტურა, რომელიც უცხოეთში მხოლოდ საქართველოს ჩემპიონებს გააგზავნის. ამით, საქართველოს ჩემპიონატი გაცილებით უფრო საინტერესო და პრესტიჟული გახდება.
შესაძლოა, ბევრს ეგონოს, რომ მევლუდ მელაძე ქალაქშიც სპორტული ავტომობილით დადის, მაგრამ რეალობა სხვაგვარია – მევლუდი მიიჩნევს, რომ თბილისისთვის იდეალურია კომპაქტური, ეკონომიური და შესაბამისად, პრაქტიკული მანქანა. კარგი ვარიანტია «მინი კუპერი», «სმარტი», ან SUV კლასის ავტომობილი, როგორიც თვითონ ჰყავს. მელუდის Honda H-RV არც ყველგანმავალია და არც მსუბუქი ავტომობილი – სადღაც შუაშია და პატრონსაც ზუსტად ეს მოსწონს. ეკონომიურია, პრაქტიკული, არაფერი უფუჭდება, მექანიკური გადაცემათა კოლოფი აქვს და სრული ამძრაობა. როგორც მევლუდი ამბობს, საკმაოდ სწრაფიცაა და ამ მანქანით ავტოდრომზე გასვლაც თავისუფლად შეიძლება. აქამდე, ასეთი ავტომობილი არასდროს ჰყოლია, რეალობამ კი მოლოდინს გადააჭარბა.
მევლუდ მელაძე მიიჩნევს, რომ თბილისისთვის იდეალური კომპაქტური და ეკონომიური მანქანებია და ძალიან კარგი იქნება, თუ ავტომობილის შეძენის მსურველები მას დაუჯერებენ...
ავტორი: ლაშა წიკლაური
ფოტოები: ირაკლი შალამბერიძე
ასევე იხილეთ:
“ვიღაც სირმა ბებერმა ცხვირწინ
”წამიტორმუზა” და უკნიდან შევახტი!..”
გიორგი ჯანელიძე - მშვიდი მძღოლი განსხვავებული ოცნებით
ასევე დაგაინტერესებთ:
ვასიკო ოდიშვილის ავტოფილოსოფია
გიორგი ქინქლაძე და მისი ბენტლი
დათო ტურაშვილი: კარგი მძღოლი არის ის, ვინც...