„ჩემთვის კარგი მანქანა არის პატარა, გამძლე და ეკონომიური“

ნიჭიერი ადამიანები თავისებური ხალხია. დათო ტურაშვილიც არაორდინალური შემოქმედია - მწერალი, მთარგმნელი, პუბლიცისტი, საზოგადოებრივად აქტიური ადამიანი, რომლის სიტყვასა და ნაწერს განსაკუთრებული ელფერი და ფასი აქვს. ტურაშვილს, როგორც დისიდენტური ბუნების ადამიანს, ყველა იცნობს და ყველა აფასებს. რაც შეეხება მის ავტოფილოსოფიას, ამას აქვე, კითხვა-პასუხის რეჟიმში გაეცნობით.

 

AUTO BILD: ყველაფერი პირველი განსაკუთრებულია - რომელი იყო თქვენი პირველი ავტომობილი?

დათო ტურაშვილი: ავტომობილი მაჩუქეს ორჯერ: პირველი იყო „ჟიგული“, 05, რომელიც მერე გავყიდეთ, მეორე კი - პატარა „ტოიოტა იარისი“,

რომელიც მგონი საუკეთესოა მსოფლიოში, რადგან საწვავი ფაქტობრივად არ სჭირდება და თანაც ყველაფერს უძლებს.

AUTO BILD: რა კრიტერიუმებს უნდა აკმაყოფილებდეს თქვენთვის კარგი ავტომობილი?

დათო ტურაშვილი: ჩემთვის კარგი მანქანა არის პატარა, გამძლე და ნაკლებხარჯიანი.

AUTO BILD: რამდენად კარგად გესმით ავტომობილი? თვითონ თუ შეგიკეთებიათ?

დათო ტურაშვილი: ავტომობილებში საერთოდ ვერ ვერკვევი და მართვის გარდა არაფერი ვიცი.

AUTO BILD: უსაფრთხოების ღვედს როგორ ეგუებით?

დათო ტურაშვილი: ფაქტია, რომ ყველანი ადვილად მივეჩვიეთ.

AUTO BILD: რამდენად მოწესრიგებული მძღოლი ხართ?

დათო ტურაშვილი: მანქანას იშვიათად ვატარებ, ძირითადად ფეხით დავდივარ, მაგრამ თუ მომიწევს საჭესთან ჯდომა, ყოველთვის

ვცდილობ, მოძრაობის წესები არ დავარღვიო.

AUTO BILD: როგორ მძღოლს უწოდებთ კარგ მძღოლს?

დათო ტურაშვილი: ჩემი აზრით, კარგი მძღოლი არის ის, ვინც სხვაზე ზრუნავს.

AUTO BILD: მანქანა თქვენთვის მხოლოდ გადაადგილების საშუალებაა, თუ სხვა რამესაც ნიშნავს?

დათო ტურაშვილი: ფეხით სიარული მირჩევნია...

AUTO BILD: ნასვამ მდგომარეობაში მჯდარხართ საჭესთან?

დათო ტურაშვილი: ერთხელ ვიჯექი, ახალგაზრდობაში და რომ მახსენდება, ახლაც ძალიან მრცხვენია.

AUTO BILD: როგორ ფიქრობთ, ჩვენთანაც უნდა იზომებოდეს ალკოჰოლის დოზა ნასვამი მძღოლის დაჯარიმებისას?

დათო ტურაშვილი: ევროპელებისაგან იმით განვსხვავდებით, რომ ჩვენ ზომიერად სმა არ შეგვიძლია...

AUTO BILD: ავტობანზე სისწრაფე ლიმიტირებულია და 110 კმ/სთ-ს შეადგენს - ეს დისკომფორტს გიქმნით?

დათო ტურაშვილი: არა.

AUTO BILD: ქართველი მძღოლის ფენომენზე რას გვეტყვით?

დათო ტურაშვილი: ჩვენს განსაკუთრებულ უცნაურობაზე ნამდვილად მეტყველებს ის ფაქტი, რომ მსოფლიოში არ არსებობს მეორე ქალაქი, სადაც ამდენი დიდი და შავი ავტომობილი დადის. იმ ავტომობილებს ვგულისხმობ, ყველას „ჯიპებად“ რომ მოვიხსენიებთ. ევროპაში პირიქითაა - ასეთი გრანდიოზული „ჯიპებით“ მხოლოდ სოფლებში და მთებში დადიან...

AUTO BILD: შეაფასეთ ქართული საგზაო/საავტომობილო რეალობა ერთი სიტყვით.

დათო ტურაშვილი: უმძიმესი!

ასევე იხილეთ:

გიორგი ქინქლაძე და მისი ბენტლი

რომელს ისურვებდით ცოლად ან საყვარლად - მანქანა რომ ქალი იყოს?


უკრაინის პოლიციის სექს-სიმბოლო: ლიუდმილა მილევიჩი


გოგო მანქანით ასე უნდა გაასეირნო...


სილამაზე ამერიკულად 2016


პირელის სულ სხვანაირი კალენდარი