Bentley Bentayga-ს ხომ კარგად იცნობთ? ყველაზე სწრაფი, ყველაზე ძვირფასი და ა.შ. და როგორია ეს ბრიტანელი სხვა ლუქს-SUV-ებთან შედარებით?

მულტიტალანტი, უნივერსალური გენია, ყოვლისშემძლე ავტომობილი - ოფიციალურ, PR-პრესრელიზებში მდიდრული SUV-ების შესახებ რას აღარ წაიკითხავ. არადა, სინამდვილეში არ არსებობს არცერთი ავტომობილი, რომელიც 100 პროცენტით ყოვლისშემძლე იქნება. იმიტომ, რომ მართლა ყოვლისშემძლე მანქანა სპორტული ავტომობილივით სწრაფიც უნდა იყოს, ლუქს-სედანივით კომფორტული და მდიდრულიც, საოჯახო უნივერსალივით პრაქტიკული და პრაგმატულიც და ყველგანმავლის დარი გამავლობაც უნდა ჰქონდეს. ეს ყველაფერი ერთად კი, მაღალ დონეზე, შეუძლებელია. ბრიტანელები გვეუბნებიან, ეგ აქამდე იყო შეუძლებელიო. და ახლა რა მოხდა ისეთი? საქმე ისაა, რომ თავისი სუპერ-SUV ”ბენტლიმაც” გამოუშვა. შეუძლია თუ არა Bentayga-ს მართლაც ყველაფერი? შევეცდებით, ამ კითხვას ამომწურავი პასუხი გავცეთ.



თუმცა 608-ცხენისძალიანმა და მინიმუმ 208 488 ევროდ შეფასებულმა ბრიტანელმა ეს ყველაფერი მარტომ არ უნდა დაამტკიცოს. იტალიაში გამართულ ტრადიციულ TEST THE BEST-ზე ჩვენ მასთან ერთად კიდევ ორი ისეთი ლუქს-SUV გვყავდა, ასევე SUV-კლასის მეთაურობაზე რომ აქვთ პრეტენზია. ამრიგად, Bentley Bentayga-ს გარდა ამ სამიტში მონაწილეობას იღებდნენ 550 ცხენის ძალის მქონე Range Rover 5.0 V8 SC LWB SVAutobiography (ფასი: 190 000 ევროდან) და Mercedes GLS 500 4Matic (455 ცხენის ძალა, 90 000 ევროდან). ამ დიდ შეხვედრაში მონაწილეობისთვის ჩვენ ”მერსედესს”, რა თქმა უნდა, GLS 63 AMG ვთხოვეთ (585 ცხენის ძალა, 130 000 ევროდან), მაგრამ შტუტგარტელებმა ამ მოდელის გამოყოფა, სამწუხაროდ, ვერ მოახერხეს და ჩვენც და თქვენც GLS 500 4Matic-ს უნდა დავჯერდეთ.


ამ სამეულში GLS, ცოტა არ იყოს, მოკრძალებული ტიპია. გამოირჩევა სვლის სრულყოფილი კომფორტით და უაღრესად ფუნქციური ძარით. ისე, წესით, ამ სამიტზე ”მერსედესს” GLS 63 AMG უნდა გამოეგზავნა

”ბენტლის” გმირი ყველაზე ახალი და, შესაბამისად, ყველაზე თამამია. ფიურერობა სამართლიანად რომ უნდა, ამას მარტო თავისი ვიზუალითაც ამტკიცებს. ვიზუალური დათვალიერებისას ერთხელაც არ გამახსენდა ის ფაქტი, რომ Bentayga თანაკონცერნელი VW Touareg-ისა და Porsche Cayenne-ის ტექნიკურ პლატფორმაზეა შექმნილი. თუმცა ეს სულერთიცაა, რადგან მისი მთავარი მეტოქეები თანაკონცერნელი ბიძაშვილები კი არ არიან, არამედ ისევ და ისევ ბრიტანული სტილის ფუძემდებელი Range Rover - უფრო კონკრეტულად კი, ”რენჯის” საუკეთესო, სუპერ-ვერსია.

2015 წელს წარმოდგენილი SVAutobiography თავისი V8-კომპრესორით და გრძელი ბაზით შთამბეჭდავად გვიჩვენებს, როგორი უნდა იყოს მდიდრული SUV. ”ბენცი” კი, ამ სამეულში, ცოტა არ იყოს, მოკრძალებული ჩანს - მიუხედავად იმისა, რომ ისიც ამ ლიგაში თამაშობს. კიდევ ვიმეორებთ: კარგი იქნებოდა, რომ აქ GLS 63 AMG გვყოლოდა.


MERCEDES: ფუნქციური, დალაგებული და მოხდენილი, მაგრამ განახლებას საჭიროებს... მართალია, GLS-ში უმაღლესი ხარისხის მასალებია, მაგრამ ცენტრალურ კონსოლზე არაერთ დეტალს იცნობთ ”C-კლასიდან”


GLS-ში არც სივრცის ნაკლებობაა და ჯდომის კომფორტიც იდეალურია, მაგრამ არისტოკრატიული დიდებულებით არ გამოირჩევა. კინოს ფულის გადახდის შემთხვევაში აქაც მიიღებთ


ადგილი შვიდი მგზავრისთვის: მესამე რიგში ორი ზრდასრული ადამიანი მოთავსდება

პირველად სწორედ ”მერსედესში” მოვთავსდით და თავი პირველივე წამიდან კარგად ვიგრძენი. ჯდომის კომფორტი, სივრცე, მომსახურება, მასალების ხარისხი - ამაზე უკეთესი რაღა უნდა იყოს? მიუხედავად იმისა, რომ ცენტრალური კონსოლის დეტალები ”C-კლასიდან” გეცნობა, GLS-ის ინტერიერს ფაქტობრივი შეფასებისას ვერაფერს დაუწუნებ.

ახლა ”ბენტლი”. ამ ბრენდისთვის დამახასიათებელ კოკპიტზე ხელით ნაკერი ტყავი და ხელით პოლირებული ხე მაშინვე შთაბეჭდილებას ახდენს. ოკეი, საჭეზე ბერკეტები იგივეა, რაც Audi Q7-ში, მაგრამ ეს ამბავი ”ბენტლის” შარმს ოდნავადაც არ აკნინებს.


BENTLEY: ინტერიერი 58-მა ოსტატმა ხელით გააკეთა... Bentley the best: ტრადიციული ხარისხი ხისა და ტყავის შესრულების თითოეულ დეტალში იგრძნობა. უახლესი ტექნოლოგიები კი უაღრესად ოსტატურადაა ინტეგრირებული


”ბენტლი ბენტაიგაში” უკან ჯდომაც დიდი სიამოვნებაა.


კლიმატკონტროლის, სავარძლების გათბობისა და გასართობი ფუნქციების დისტანციური მართვა ”ბენტაიგაში”

გრძელ ”რენჯში” გადავიდეთ. და მოდი, პირდაპირ უკან მოვთავსდეთ! იმიტომ, რომ სწორედ უკანა სავარძელზე გვთავაზობს სასწაულებს. ჯერ ერთი, მეფესავით ზიხარ - საუკეთესო ხარისხი, უმაღლესი კომფორტი, ტყავის სავარძლები მასაჟის, გათბობისა და გაგრილების ფუნქციით, ელექტრონული საპიკნიკე მაგიდა, ჩაციებული შამპანური მაცივარში... WOW!

ერთი სიტყვით, მდიდრულობის მაძიებელი მგზავრი ამ ”რენჯ როვერის” უკანა სავარძელზე არაფერს მოისაკლისებს, აი, მძღოლს კი ექნება გარკვეული ჩივილები. სუპერ-რენჯი ყურადსაღებ გამავლობას და საკმარისზე გაცილებით მეტ სიმძლავრეს გვთავაზობს. 550 ცხენის ძალა 2,7-ტონიან მანქანას 100 კმ/სთ-მდე 5,5 წამში აჩქარებს. ეს ყველაფერი კი მართლაც ძალიან დიდი სიამოვნებაა - ოღონდ მანამდე, სანამ პირდაპირ დადიხარ. მოსახვევებში კი ეს დიდი და მძიმეწონოსანი ლუქს-გემი ნაღდად ვეღარ გასიამოვნებს. დინამიკაზე არც უნდა იფიქრო...


RANGE ROVER: მდიდარი, როგორც ლუქს-იახტა! SVAutobiography-ს ინტერიერში დიდი განცხრომა გელით. მომსახურებას გარკვეულწილად მიჩვევა სჭირდება, მაგრამ კომფორტი და მდიდრულობის შეგრძნება აქ უმაღლეს საფეხურზეა


”რენჯის” უკანა სავარძლები მასაჟებსაც გიკეთებს, თბება, გრილდება და საერთოდ, აქ შესანიშნავად გაერთობი. ამ მხრივ ”ბენტლის” ნამდვილად უწევს კონკურენციას

მართვის სიამოვნება ”მერსედესშიც” საკმაოდ შეზღუდულია. მართალია, ”რენჯზე” მგრძნობიარე მოხვევა აქვს და სტაბილურობის შენარჩუნების ასისტენტიც კარგად მუშაობს, მაგრამ ESP ზედმეტად ადრე ერთვება საქმეში და გზღუდავს. არადა, ჯერ კიდევ 1750 ბრუნზე მგრგვინავი V8 ძრავა და ძალიან კარგი 9-საფეხურიანი ავტომატიკა ისეთ სურვილებს გიღვივებს, ამ კლასის ავტომობილში რომ არ ელოდი.

აი, Bentayga-ს კი ამ თვალსაზრისით მართლაც მეტი შეუძლია - მეტი ცილინდრი, მეტი სიმძლავრე, მეტი კონტაქტი, მეტი ცხოვრება და სიამოვნება. ბრიტანელის W12 ძრავა აქსელერატორზე ოდნავ მიჭერის დროსაც კი ისე მიგაკრავს ტყავის შესანიშნავ სავარძელში, რომ გრძელი ”რენჯიც” და GLS-იც რამდენიმე წამში დაგავიწყდება. 4,1 წამში სპიდომეტრზე უკვე 100 კმ/სთ წერია, 301 კმ/სთ-ით კი Bentayga არც მეტი, არც ნაკლები, მსოფლიოში ყველაზე სწრაფი სერიული SUV-ია.


ორი აზრის არსებობა დაუშვებელია: ”ბენტლი” ამ შედარებაში ”მერსედესზე” და ”რენჯ როვერზე” გაცილებით დინამიკურია

მერე კი შეხვალ პირველსავე მოსახვევში და ზემოთ ხსენებულ კონკურენტებთან სხვაობა კიდევ უფრო იზრდება! იქ, სადაც GLS-ს თავისი ESP ზღუდავს, ხოლო ”რენჯის” პილოტს კი პირველსავე მოსახვევში სისწრაფის მცირეოდენი გადაჭარბების შემთხვევაშიც კი ოფლი დაასხამს, Bentayga მოსახვევიდან მოსახვევამდე სპორტული ავტომობილის დარი დინამიკით მიიჩქარის.

დაკიდების კომფორტი? სამივე მათგანს საუკეთესო აქვს. და ამასთან, სიმაღლეში რეგულირებადი პნევმო-დაკიდებითა და სპეციალური ოფროუდ-რეჟიმებით სამივე სუპერ-SUV მივა იქ, სადაც საიდანაც კაცობრიობამ ასეთ მანქანებზე ფიქრი დაიწყო - უგზოობაზე.


როცა მანქანა შენი ციხე-სიმაგრეა: ამ ავტომობილით ყურადღების ცენტრში ყოფნა ყველგან და ყოველთვის გარანტირებულია. ”ბენტაიგაში” უამრავ ძვირფას დეტალს შეხვდებით, თუმცა ამას აქ რა უნდა? პლასტმასის ეს შავი სახელური ალბათ VW Polo-ს თაროდან ჩამოიღეს

გაწონასწორებულმა, მძლავრმა, დინამიკურმა და გლამურულმა Bentley Bentayga-მ ეს სამიტი თავის სასარგებლოდ გადაწყვიტა. ჯერჯერობით ის მართლაც SUV-კლასის მეთაურია. ოღონდ მართლა ჯერჯერობით, რადგან უკვე გვესმის იმ V12-ის ჟღერადობა, რომელიც არაუგვიანეს 2019 წელს უნდა ვნახოთ - Rolls-Royce Cullinan-ში. მერე მას სწორედ ”როლს-როისის” SUV უნდა შევახვედროთ - აი, დუელიც ის იქნება, თუ იქნება. მანამდე კი ”ბენტაიგა” აბსოლუტური მასშტაბია, რადგან ფრენის გარდა მართლაც (თითქმის) ყველაფერი შეუძლია...


სწორხაზოვანი ბრიტანული სტილი: ”რენჯი” დიდი ხანია, თავის სტილს არ ღალატობს და კლასში მოდის ფუძემდებელია. სპეციალური Event-სისტემა (მარჯვნივ) 7 344 ევრო ღირს

• Bentley Bentayga

ძრავა: W12, Biturbo; მოცულობა: 5950 სმ3; სიმძლავრე: 447 კვტ (608 ცხ. ძ.)/5000; ბრუნის მომენტი: 900 ნმ/1350; მაქს. სიჩქარე: 301 კმ/სთ; აჩქარება 0-100 კმ/სთ: 4,1 წამში; ამძრაობა: მუდმივი 4x4/8-საფ. ავტომატიკა; ავზი: 85 ლ.; სიგრძე/სიგანე/სიმაღლე: 5141/1998/1742 მმ; საბარგულის მოცულობა: 430 ლიტრი; წონა: 2422 კგ; საწვავის ხარჯი (EU-Mix): 13,1 ლიტრი SP/100 კმ-ზე; გამონაბოლქვი: 296 გ/კმ; ფასი: 208 488 ევროდან

• Mercedes GLS 500 4Matic

ძრავა: V8, Biturbo; მოცულობა: 4663 სმ3; სიმძლავრე: 335 კვტ (455 ცხ. ძ.)/5250; ბრუნის მომენტი: 700 ნმ/1800; მაქს. სიჩქარე: 250 კმ/სთ; აჩქარება 0-100 კმ/სთ: 5,3 წამში; ამძრაობა: მუდმივი 4x4/9-საფ. ავტომატიკა; ავზი: 100 ლიტრი; სიგრძე/სიგანე/სიმაღლე: 5130/1934/1850 მმ; საბარგულის მოცულობა: 680-2300 ლიტრი; წონა: 2581 კგ; საწვავის ხარჯი (EU-Mix): 10,9 ლიტრი S/100 კმ-ზე; გამონაბოლქვი: 255 გ/კმ; ფასი: 91 000 ევროდან

• Range Rover 5.0 V8 SC LWB SVAutobiography

ძრავა: V8, Kompressor; მოცულობა: 5000 სმ3; სიმძლავრე: 405 კვტ (550 ცხ. ძ.)/6000; ბრუნის მომენტი: 680 ნმ/3500; მაქს. სიჩქარე: 250 კმ/სთ; აჩქარება 0-100 კმ/სთ: 5,5 წამში; ამძრაობა: მუდმივი 4x4/8-საფ. ავტომატიკა; ავზი: 105 ლიტრი; სიგრძე/სიგანე/სიმაღლე: 5199/1998/1840 მმ; საბარგულის მოცულობა: 784 ლიტრი; წონა: 2713 კგ; საწვავის ხარჯი (EU-Mix): 12,8 ლიტრი SP/100 კმ-ზე; გამონაბოლქვი: 299 გ/კმ; ფასი: 190 000 ევროდან



დასკვნა
ამ დიდი სამიტის შემდეგ ცხადია, რომ სუპერ-SUV-ების ფიურერი ნამდვილად ”ბენტლი ბენტაიგაა”. იმიტომ, რომ დინამიკისა და მდიდრულობის ყველაზე გლამურულ ნაზავს გვთავაზობს. ”რენჯი” პრესტიჟული ალტერნატივაა, ”მერსედესი” კი ყოველდღიური ხმარებისთვისაა სრულყოფილი. აი, სამიტზე GLS 63 AMG რომ გამოეგზავნათ, შეიძლება, ყველაფერი თუ არა, ცოტა რამ მაინც ყოფილიყო სხვანაირად...
შალვა ბუაჩიძე



ასევე იხილეთ:
მერსედესი, როგორც თევზი წყალში (+ ვიდეო)


მერსედესის პიკაპი უკვე იტესტება


ბრაბუსის ახალი სიამაყე: G-კლასი 700 ცხენის ძალით


არის თუ არა მერსედესი ისევ მისაბაძი?


ავტომობილის 10 საუკეთესო ინტერიერი ამერიკელების აზრით


ერთ-ერთი ყველაზე უნაკლო მერსედესი


მერსედესის ახალი SUV-კუპე: GLC Coupe


2016 წლის საუკეთესო 4x4 ავტომობილები


ბრაბუსმა 8 კლასიკური მერსედესი განაახლა


ახალი ცნობები მერსედესის პიკაპის შესახებ


ახალი E-კლასის AMG ვერსია


ეს მაიბახი თითქმის ტანკია!


გაიცანით: Mercedes-Maybach S 600 Guard


ირინა შეიკს მერსედესი და ლამბორგინი უყვარს


ახალი Mercedes E-კლასი: ჭკვიანი, ლამაზი და S-კლასური!


ახალი, სამხედრო Mercedes G-კლასი


”ზევსი” G-კლასი ”მრისხანე გამოხედვით” და 880 ცხენის ძალით!


ამ მერსედესმა 5000 კილომეტრი ძრავის გარეშე გაიარა! [+VIDEO]


როცა თამამად შეგიძლია თქვა, რომ ტანკში ზიხარ...


”ბრაბუსის” უახლესი და საუკეთესო მოდელები


G-კლასების ტიუნინგი Mansory და Mcchip-dkr-სგან


მომხმარებლებმა ბრაბუსი საუკეთესოდ დაასახელეს


ჩავიხედოთ ბრაბუსის მაიბახში!


ბიზნეს-ბრაბუსი: ოფისი 800 ცხენის ძალით!


რევოლუცია ახალ Mercedes E-კლასში! (+ VIDEO)


ქალწული ბენცი


ერთი დღე ნახევარმილიონიან მერსედეს-მაიბახში


S-კლასი ყველგანმავლებში: Mercedes GLS


ყველაზე მდიდრული და უსაფრთხო გელენდევაგენი


მერსედესმა GLE-ს ტოპმოდელი გაგვაცნო


G-კლასი მეტი სიმძლავრით და მეტი კომფორტით (+ VIDEO)


GOODBYE, MY FRIEND!
ვემშვიდობებით Land Rover Defender-ს


ლენდ როვერ დეფენდერის სუპერ-ზონდერი


იხილეთ გალერეა:
Land Rover Defender-ის ზონდერმოდელები


ასეთი იქნება მომავალი დეფენდერი?


ასევე იხილეთ:
რა შეუძლია Range Rover-კაბრიოლეტს? (+ VIDEO)


ლენდ როვერის ”დისკო” თუ Mercedes GLC?


რენჯ როვერი ასეთი მრისხანე აქამდე არასდროს ყოფილა


სმარტფონი მართავს რენჯ როვერს! (+ VIDEO)


რენჯ როვერი გააპიკაპეს...


დედოფლის ახალი რენჯ როვერი


10 ყველაზე სწრაფი SUV