ჩვეულებრივ, ხალხი ცდილობს A პუნქტიდან B პუნქტში უმოკლესი გზით მივიდეს. თეორიულად, ეს ყველაზე სწორია - ნაკლები დრო და ენერგია იხარჯება, მაგრამ პრაქტიკულად საქმე სხვანაირადაა : გააჩნია, B პუნქტში მანქანის დასაყენებელი ადგილი დაგხვდება, თუ არა. თუ არ დაგხვდა და გასაჩერებლის ძებნაში 2AB მანძილის გავლა მოგიხდა, რად გინდა ასეთი... გინდა? ნამდვილად არ გინდა. ამიტომ, ჯობია თავიდანვე გათვალო სად გაქვს ავტომობილის გაჩერების მეტი შანსი და მარშრუტიც ამის მიხედვით შეადგინო.

ამასწინათ, სწორედ ასე მოვქეცი და საშინლად ბანალური რაღაც მომივიდა. შევადგინე მარშრუტი, მივყევი კიდეც მას, მაგრამ... თქვენც არ მომიკვდეთ. პირველ ქუჩაზე, სადაც ჩემი თეორიის თანახმად, ადგილი უნდა დამხვედროდა, ნემსის ჩასაგდები ადგილი არ იყო; მეორეზე ნემსის ჩასაგდები ადგილი კი იყო, ოღონდ მანქანა იქ ვერ ჩაეტეოდა. მესამე ქუჩის დიდი იმედი არც მქონდა და მართალიც ვიყავი, მეოთხე ქუჩა კი თავად B პუნქტი იყო. მივუახლოვდი იმედგაცრუებული და ახლო-მახლო წვრილ-წვრილი ქუჩების იმედად დარჩენილი ამ ჩემს B პუნქტს და რას ვხედავ: პირდაპირ კიბის წინ, ყველაზე მოხერხებულ ადგილას ვეებერთელა სიცარიელეს არ დაუღია პირი? რა იყო ნეტავ, სატვირთო მანქანა ხომ არ იდგა, ამხელა ადგილი როგორ დარჩა-მეთქი ვიფიქრე. გამიხარდა, მაგრამ რა გამიხარდა. თან გულიც დამწყდა, ნეტავ ზედმეტად არ მებოდიალა და პირდაპირ აქ მოვსულიყავი-მეთქი. თუმცა, ვინ იცის, პირდაპირ რომ მოვსულიყავი, იქნებ ის "სატვირთო მანქანა" ჯერ გასული არც ყოფილიყო.

• ისე, რა ცოტა გინდა ადამიანს სიხარულისთვის, არა?

ზემოთ რომ აღვწერე, ასეთი შემთხვევები ხშირია. მიდიხარ სადღაც, ადგილს ვერ პოულობ, არადა გეჩქარება. სადმე რომ შეეტენო, მანქანას წაიყვანენ ან დაგაჯარიმებენ, არ შეეტენო და საქმე გიფუჭდება. აღარ იცი, რა ჯობია, დაგაჯარიმონ თუ საქმე არ გამოვიდეს? არც ის გინდა, არც ეს...

ერთი სიტყვით, პარკინგი დიდი პრობლემაა და როგორც ჩანს, მომავალშიც ასე იქნება. ამბობენ, რომ ქალაქის საავტომობილო ცხოვრების სწორი დაგეგმვის შემთხვევაში, ეს პრობლემა შემცირდება, მაგრამ გაქრობით რა გააქრობს, თუ ძმა ხარ?

იქნებ ინდივიდუალური გამოსავალი არსებობს? ვთქვათ ასეთი: დიდი თანამდებობის პირი რომ გახდე, B პუნქტამდე ესკორტი მიგაცილებს და ადგილსაც დაგახვედრებს. შენი გულისთვის გზას გადაკეტავენ. სამსახურთან და სახლთან ფარეხი გექნება, მაგრამ მე ეს ნაკლებად მემუქრება, თქვენ კი - რა ვიცი აბა... ნუ, მე ყოველ შემთხვევაში, მთელი გულით გისურვებთ და დანარჩენი გამოჩნდება.

• არის მეორე გზაც: გავყიდოთ მანქანები და საქალაქო ტრანსპორტით ვიაროთ.

ისე, რა გვინდა იცით? ჰარი პოტერის მესამე ნაწილში რომ ავტობუსია - საჭიროების შემთხვევაში ვიწროვდება - აი, ისეთი. მიხვალ B პუნქტში, გააბრტყელებ მანქანას ტყლაპივით და მიაყუდებ სადმე. მერე დაბრუნდები, დააჭერ ღილაკს, ავტომობილი თავის ძველ ფორმას მიიღებს, მიუჯდები საჭეს და წახვალ, საითაც მიდიოდი.

ხუმრობა გვერდით იყოს და, რაც უფრო მომრავლდება მოტოციკლები და სკუტერები, მით მეტი პარკინგის ადგილი გამოჩნდება ჩვენს ქუჩებში. კარგი იქნება დიდი მანქანების რაოდენობაც თუ შემცირდება. ამბობენ, ევროპის ქალაქებში გემისხელა ჯიპებს ვერ ნახავ, ხალხს მეტწილად პატარა მანქანები ჰყავს, ეკონომიურიც არის და გასაჩერებელი ადგილის მოძებნაც უფრო ადვილიაო.

დიდი მნიშვნელობა აქვს ქალაქმშენებლობასაც. არ დავასახელებ და, ზოგ ქალაქში კორპუსებს ერთმანეთთან ისე ახლოს დგამენ, რომ რამდენიმე უბნის გავლა მიწაზე ფეხის დაუდგმელადაც შეიძლება - შენი საძინებლიდან მოპირდაპირე კორპუსში, ვიღაცის სამზარეულოში გადახვალ, იქიდან შემდეგი სახლის აივანზე, იქიდან სხვის სააბაზანოში და ასე შემდეგ...

დამაინც, ამ ყველაფერზე სპეციალისტების აზრის მოსმენა იქნება საინტერესო. რაღა დაგიმალოთ და ტელევიზიებშიც ხშირად სამოყვარულო დონეზე ლაპარაკობენ, არადა პრობლემა სერიოზულია.

თუ არა და, ჰარი პოტერის მესამე ნაწილში რომ ავტობუსია და მისი ჯანი.