მეგობარ გოგონას ველოდებოდი. რადიოში რეტრო-ჰიტები მოდიოდა. Doors, The Kinks, The Velvet Underground, The Band, The Beach Boys, John Coltrane… გოგონა არ ჩამოდის, აგვიანებს. აწკრიალდა მობილური. ახალი ესემესი მოვიდა. ბანკიდან?
რამდენიმე დღის წინ მეგობრის მეგობარმა მაჩუქა საინტერესო მუსიკალური ნაკრები. ბევრი გენიალური სიმღერით. მოვუსმინოთ, ვეკითხები ახალ მეგობარს? იმასაც სხვა გზა არ აქვს და ცივად დაპიპინებით მეთანხმება. მოვუსმინოთ, ოღონდ არ იყოს რეპი.
გოგონას ჩამოსვლამდე დინამიკებიდან წამოვიდა Are You Gonna Be My Girl. შემსრულებელი - ჯგუფი Jet. სიმღერა, რომელიც საოცრად ჰგავს Iggy Pop-ის უკვდავ თემას Lust For Life. Jet ამ სიმღერით ახალ დონეზე გადავიდა და მე კიდევ ერთხელ დავხედე საათს. ჯერ ადრეა, 2 წუთს მხოლოდ 3 წუთი გადასცდა. ველოდებით.
დაიწყო ახალი სიმღერა. მაიკლ ჯექსონი. ეპოქა, როდესაც პოპის მეფე მხოლოდ 10 წლის იყო. და მღეროდა პროექტში Jackson 5. ლამაზი, მომთმენი და რაღაც დონეზე, განუმეორებელი პერფორმანსი სიმღერაში I Want You Back. ბიჭმა დაკარგა სიყვარული და ბიჭი ემზადება სიცარიელის ტკივილით შესავსებად. მაიკლ ჯექსონი მეფეა. და ჩემი მეგობარი ამაში კიდევ ერთი ეშხიანი დაპიპინებით დამეთანხმა.
The Prodigy. ბრიტანელი ფსიქოპატები ატონალური რიფინგით, ბევრი ბითით და კიტ ფლინტის ვოკალით, რომელიც გჭრის. სამართებელი, რომელიც ბგერებს არ ინდობს და ფლინტმა ლაიამ ჰაულეტთან ერთად იმღერა Omen. ჯგუფის მეექვსე ალბომიდან Invaders Must Die. ელექტრონული მუსიკის ახალი გენერაცია ისვენებს. ელექტრონული მუსიკის ახალი გენერაცია ფსიქოღმერთებს თავს უხრის.
მეგობარი გოგონა ჩამოვიდა. ძალიან კარგად გამოიყურება. თმა ლამაზად აქვს გადაწეული და მიცინის. დამნაშავე შეყვარებულის სიცილი. ჩაჯდა, გადმოიწია, მაკოცა, «დიზელის» ტკბილი სუნამო ავსებს სალონს და ვიქოქებით.
დინამიკებიდან წამოვიდა Queen და Don’t Stop Me Now. კოლორადოში ამას ხშირად უსმენდნენ. Dodge Challenger დაიძრა და ფრედი მერკურიმ აკრიფა.
ხანდახან შეყვარებულებიც უნდა აგვიანებდნენ.
ზურა თალაკვაძე
