«I like smoke and lightning Heavy metal thunder Racin’ with the wind And the feelin’ that I’m under» (Steppenwolf, 1968)
Dodge Charger 440, Ford Torino GT 429, Pontiac GTO, Chevrolet Chevelle SS 350, Plymouth Road Runner Superbird
ამერიკული ავტომობილების მოყვარულები ამბობენ ხოლმე, როცა ეს ავტომობილები გამოვიდნენ, ამერიკა ხელახლა იქნა აღმოჩენილიო. Muscle Car-ების
60-იან წლებში ამერიკელები საავტომობილო კუთხით საკუთარ თავს ვეღარ ცნობდნენ. დადგა მომენტი, როცა ბოლო მოეღო ამერიკელი «მამიკოების საყვარელ კრეისერებს» და ამავდროულად, იაფფასიანი ავტომწარმოებლების ქარხნებში წარმოიქმნა რაღაც ახალი - თანაც, ფაქტობრივად შემთხვევით. დეტროიტის პატარ-პატარა ჯურღმულებში ახალგაზრდა ინჟინრებმა ახალი საავტომობილო კონცეფციის «ძერწვა» დაიწყეს: ესენი იყო Factory Hot Rods, საშუალო კლასის ძალიან უბრალო მანქანები, ე.წ. Intermediates, ყოველგვარი ქრომისა და მდიდრულობის გარეშე, მაგრამ საკმარისზე გაცილებით მეტი სიმძლავრით!
მერე ამ ბიჭებმა თავიანთი ბოსები მარტივად დაარწმუნეს იმაში, რომ იაფი ავტომობილი დიდი სიმძლავრით იმ დროს და ეპოქას შეეფერებოდა. ასე შეიქმნა პირველი Muscle Car-ები (Muscle - კუნთი, Car-ავტომობილი). უდიდესი ამერიკული საავტომობილო კონცერნი General Motors თავიდან მთლად ბოლომდე არ იყო დარწმუნებული იმაში, რომ ეს კონცეფცია გაამართლებდა, მაგრამ GM-ის შეფებმა მაინც გადაწყვიტეს და 1964 წელს გამოუშვეს Pontiac GTO 6,3-ლიტრიანი, 8-ცილინდრიანი ძრავით! არადა, ასეთმა ავტომობილებმა თავიდანვე მოიხვეჭეს პოპულარობა - განსაკუთრებით ახალგაზრდებში, რომლებმაც 60-იან წლებში ამ ახალი «სათამაშოების» მასობრივად შეძენა დაიწყეს.
კრაისლერის, ფორდისა და ჯენერალ მოტორსის ომი
როგორც კი ბუმი დაიწყო, მაშინვე თითქმის ყველა ამერიკულმა მწარმოებელმა აიტაცა ახალი მოდა და თავისი Muscle Car თითქმის ყველამ გამოუშვა. ფაქტობრივად გაჩაღდა ომი «კრაისლერს», «ფორდსა» და «ჯენერალ მოტორსს» შორის, რომლებიც ერთმანეთს არა მარტო ავტომობილებით, არამედ ფსიქოდელიური სარეკლამო კამპანიებით, აგრესიულო სლოგანებითა და ძალიან დიდი ძრავებით ებრძოდნენ. ამრიგად, ამერიკული ავტოგემოვნება Cruising Night-დან Drag Racing-ზე გადავიდა - თანაც, ამ პროცესს ფონად «როკ ენ როლი» გასდევდა და პროცესს აძლიერებდა. სწორედ მაშინ აღმოცენდა «ჰევი მეტალიც» და ისეთმა ჯგუფმა, როგორიც იყო Steppenwolf, ნამდვილად დაამშვენა სისწრაფისა და სიმძლავრის მოყვარული ავტომობილისტების ეპოქა ისეთი კლასიკური ჰიტით, როგორიცაა Born to Be Wild.
გადავწყვიტეთ, Muscle Car-ების ოქროს ეპოქიდან ხუთი ველური ტიპი წარმოგიდგინოთ და რაკი სრულიად არარაციონალური ავტომობილების რაციონალურად შეფასება წარმოუდგენელია, თქვენი დასკვნები თქვენვე გააკეთეთ. Ford Torino, Pontiac GTO, Chevy Chevelle, Dodge Charger და Plymouth Superbird - რომელია საუკეთესო? ჩვენ ჩვენი რეიტინგი შევადგინეთ, მაგრამ დარწმუნებულები ვართ, თითოეულ თქვენგანს თვენი საკუთარი ვერსია ექნება.
მაშ ასე: დიდი ძრავები, ცხენის ძალები, ფერები, ხმა, ადრენალინი - Fasten your seatbelts!
მეხუთე ადგილი: Plymouth Road Runner Superbird
Muscle Car-ებმა საავტომობლო ამერიკა ჭკუიდან შეშალა - რა აღარ მოიფიქრეს, რა აღარ მოიმოქმედეს. ინჟინრები, დიზაინერები, სარეკლამო ტექსტების ავტორები - ყველანი ერთმანეთს ებრძოდნენ. ამ «პლიმუთის» მისიაც ის იყო, რომ ყველა და ყველაფერი გადაეფარა, ყველასათვის და ყველაფრისთვის გადაეფრინა! ამიტომაც დაარქვეს Superbird (სუპერჩიტი).
მისი სრული სახელწოდება კი Plymouth Road Runner Superbird გახლდათ - დიზაინი და იმიჯი განუმეორებელი ჰქონდა და მისი დღევანდელი ფასიც დაუჯერებელია!
ამ ავტომობილს მანევრულობისა და ყოველდღიური მოხმარების კრიტერიუმებში მოდით, ასე შევაფასებთ: თავგადასავლებისთვის მომზადებული ტიპია! მისი დიზაინი ყველას არ მოეწონება და ბევრი ცხვირი პროთეზსაც ალმაცერად შეხედავს, მაგრამ ფაქტი ის არის, რომ ამ «პლიმუთის» მფლობელის ბევრს შურდა - ძალიან ბევრს!
თუმცა ავტომობილის შეფასების ევროპულ მთავარ კრიტერიუმში, ღირებულების ეფექტის მხრივ ვერ ბრწყინავს და ამიტომაც უნდა დასჯერდეს მეხუთე ადგილს ამ კომპანიაში. ასე რომ, NASCAR-ის ბოლიდი XXL სპოილერით ამ ხუთეულში ბოლო ადგილზე გაგვყავს.
ხვალ: მეოთხე ადგილი.
ტექნიკური მონაცემები
ძრავა V8; სარქველები/გამ. ლილვი 16/1; გამ. ლილვის მექანიზმი ჯაჭვი; ძრავის მოცულობა 7212 სმ3; კვტ (ცხ. ძ) ბრ/წთ 287 (390)4600; ბრუნის მომენტი 651 ნმ/3200; მაქს. სიჩქარე 240 კმ/სთ; გად. კოლოფი 3-საფ. ავტომატიკა; ამძრაობა: უკანა; ავზი: 76 ლ.; საწვავის ხარჯი: 27 ლ/100 კმ-ზე.
დღევანდელი ფასი: 180 000 ევრო
The Loved Bird – «პლიმუთის» სარეკლამო ტექსტი 1970 წელს
იხილეთ ფოტოგალერეა:
საუკეთესო კლასიკური ავტომობილები