Chevrolet Aveo არაფრით გამორჩეული, მაგრამ საკმაოდ ხარისხიანი და გამძლე ავტომობილია. ვერც განსაკუთრებული კომფორტით დაიკვეხნის და არც პრესტიჟული მანქანა ეთქმის. სამაგიეროდ, 100 პროცენტით აკმაყოფილებს ფასთან შესაბამისობის კრიტერიუმს - საკმაოდ დაბალ ფასად მიიღებთ კომპაქტურ, კლასის გათვალისწინებით მაქსიმალურად პრაქტიკულ და ეკონომიურ სედანს, რომელსაც უდიდესი ისტორიის მქონე ამერიკული მარკის, ”შევროლეს” ლოგო ამშვენებს.



სალონში იაფფასიანი, ძირითადად მაგარი პლასტმასის მასალებია გამოყენებული. ინტერიერში სივრცე იმაზე მეტია, ვიდრე ავტომობილის გარედან დათვალიერებისას შეიძლება წარმოიდგინოთ. უკან ორი მგზავრი ნორმალურად მოთავსდება. ”ავეოს” საკმაოდ ტევადი და იოლად ხელმისაწვდომი საბარგული აქვს. საქართველოში ძირითადად გვხვდება 1,2 და 1,4-ლიტრიანი ძრავებით. საწვავის ხარჯი მექანიკური გადაცემათა კოლოფის შემთხვევაში ქალაქში მინიმუმ 7-8, მაქსიმუმ კი 9 ლიტრია (კონდიციონერით), ავტომატური კოლოფით კი - ”ავეო” 10 ლიტრ საწვავს მოიხმარს. ქალაქგარეთ მგზავრობისას საწვავის ხარჯი 5-6 ლიტრამდე მცირდება.



”შევროლე ავეოს” სერვისი საკმაოდ იაფია. ხელოსნებს მისი შეკეთება არ უჭირთ და ნაწილებიც იშოვება. ამის მიზეზი ის არის, რომ ”ავეოს” სავალ ნაწილში ძირითადად ”ოპელის”, კერძოდ კი ”ოპელ ასტრას” ნაწილები ესადაგება. ამ მანქანას ნებისმიერი გამოცდილი ხელოსანი იოლად შეაკეთებს.

ვინც ”ავეოს” კარგად მოუვლის, მანქანა მოულოდნელი გაფუჭებით პრობლემას არ შეუქმნის. მანქანა ვერ იტანს უხეშ მოპყრობას და მართვის აგრესიულ სტილს. დროთა განმავლობაში სალონში შეიძლება სხვადასხვა დეტალები აჭრაჭუნდნენ...

მისი მთავარი პლუსი ხელმისაწვდომი ფასია - ამ ფასად ამ კლასისა და ამ ასაკის ”ავეოზე” უკეთეს მანქანას ვერ იპოვნით.