ეს მოხდა 1999 წელს და ეს იყო სიყვარული ერთი ნახვით. გვერდიდან ორმუნდშტუკიან სიგარას ჰგავდა, შუაში ქრომირებული ზოლით - ”როვერმა” მაშინ 75-ით ძველი ტრადიცია აღადგინა. AUTO BILD-ის ბრიტანული ვერსიის, ჟურნალ AUTO EXPRESS-ის დახმარებით მე მაშინ პირველი გერმანელი ჟურნალისტი გახლდით, რომელიც Rover 75-ის გამო კუნძულზე გაემგზავრა და ეს მანქანა საქმეში ნახა. წლები გავიდა, სიყვარული დარჩა.
”როვერის” ”იაგუარი”? არა, 75 უბრალოდ ჰგავს, ისე კი, მისი ძარის მიღმა BMW-ს
ახლა კი შტუტგარტში ვართ და მეორადი ავტომობილების სადილეროში ჩემს წინ ისევ Rover 75 დგას - მეტალიკით, ტყავით, V6 ძრავით. და ამ მანქანას დაუჯერებელ ფასად, სულ რაღაც 1600 ევროდ მთავაზობენ. მაინც რატომაა ის ასეთი იაფი? მოდით, ჩავსხდეთ და გავიგოთ.
დიზაინერებმა მაშინ ინტერიერში ყველაფერი ელიფსური გააკეთეს: ინსტრუმენტები, საჰაეროები, ჩამრთველები, ღილაკები, სარკეები - ყველაფერი ოვალურია. კრემისფერი ტყავის დამუშავება იმხანად ტოპ-მოდელ Celeste-ში სერიული გახლდათ. წინ კლუბური ატმოსფეროა, უკან კი სივიწროვე - ყოველ შემთხვევაში ჩემთვის, 1,88-მეტრიანი კაცისთვის.
კრემისფერი ტყავში გადაწყვეტილი სავარძლები დღემდე კარგ მდგრომარეობაშია
გასაღები, ისევე, როგორც კიდევ რამდნეიმე დეტალი, ”როვერმა” მაშინდელი მფლობელისგან, BMW-სგან მიიღო. თუმცა არ იფიქროთ, რომ 75 მთლიანად BMW-მ შექმნა - არა, ეს მანქანა მაინც ”როვერის” ქმნილებაა. თუმცაღა ძარის მიღმა აქა-იქ მართლაც შეხვდებით BMW-ს ტექნიკას. დავქოქოთ! V6 ძრავა ისე ჩუმად ახველებს, როგორც კარგი შვეიცარი. საბედნიეროდ, მის პირველ მფლობელს 5-საფეხურიანი ავტომატიკა შეუკვეთია, მაგრამ კომფორტული ტრანსმისია სიმძლავრეს ყლაპავს და ”როვერის” 2-ლიტრიან ძრავას მაღალი ბრუნები სჭირდება. სწორედ აქ უნდა ვთქვათ, რომ 4-ცილინდრიანი, 1,8-ლიტრიანი ძრავა, რომელსაც ტურბინის წყალობით 150 ცხენის ძალა აქვს, უკეთესი აგრეგატია, ხოლო 2,5-ლიტრიანი V6 კი, 177 ცხენის ძალით - სულაც იდეალური. ცნობისათვის, Rover 75 BMW-ს 2-ლიტრიანი დიზელის ძრავითაც იწარმოებოდა (რომელი BMW-ს ”მესამე სერიიდან” გადაუნერგეს), მაგრამ ამ აგრეგატით აღჭურვილ ”როვერს” ევროპის ეკოლოგიურ ზონებში აღარ მიესვლება.
გზად თვალშისაცემია ის ფაქტი, რომ წინა ამძრაობის მქონე სედანი კომფორტზეა ორიენტირებული. 75-ს რბილი დაკიდება აქვს და ამ მანქანით ბობოქრობა რეკომენდებული არ არის. თანაც, ასეთ შემთხვევაში საწვავის ხარჯი 100 კილომეტრზე 10 ლიტრზე მეტი არ იქნება, რაც ჩარჩოებში ზის.
ბენზინის V6-ძრავა. ამ ეგზემპლარში გაზიც ჩაუყენებიათ
კინაღამ დამავიწყდა: 2001 წელს კომბიც გამოვიდა და Tourer დაარქვეს. 4 წლის შემდეგ კი ლონგბრიჯის ქარხნიდან უკანასკნელი Rover 75 გამოაგორეს. დღეისათვის Rover უკვე ჩინელების ხელშია, ჩინური მარკაა და Roewe-ს ჰქვია. გასაგებია, მაგრამ მთავარი კითხვა: ნაწილები იშოვება? კი, ოღონდ საუკეთესო და ორიგინალები ინგლისში.
და მაინც, რატომაა Rover 75 ასეთი იაფი? ალბათ მაინც მარკის ბრალია. თანაც, იშვიათი მანქანაა. მაგალითად, გერმანიაში დღეისათვის მხოლოდ 9 250 Rover 75-ია რეგისტრირებული. აქვე ისიც ვთქვათ, რომ იდეალურად მოვლილი ეგზემპლარები 2,5-ლიტრიანი V6 ძრავით და 100 000 კილომეტრზე ნაკლები გარბენით ძირითადად 4000 ევროზე მეტიც კი არ ღირს.
დასკვნა
2000 ევროზე იაფად დღეს ახალ Vespa-საც კი ვერ შეიძენთ. სამაგიეროდ, შეიძენთ მეორად Rover 75-ს - ამ მშვიდ ჯენტლმენს, რომელსაც ბრიტანული აურა დაჰყვება. რამდენიმე ნაკლს დეტალებში ნაღდად აპატიებთ. ჩემი რჩევა: იყიდეთ 2,5-ლიტრიანი ძრავის მქ
ონე ვერსია ავტომატიკით.შტეფან დილი
Rover 75 2.0
გამოშვების წელი - 2001
გარბენი - 235 207 კმ
ფასი - 1600 ევრო
ტექნიკური მონაცემები
ძრავა: V6
სარქველები/გამ. ლილვი: ცილინდრზე 4/4
მოცულობა: 1997 სმ3
სიმძლავრე: 110 კვ (150 ცხ. ძ)/6500
ბრუნის მომენტი: 185 ნმ/4000
მაქს. სიჩქარე: 205 კმ/სთ
0-100 კმ/სთ: 11,6 წამში
გად. კოლოფი/ამძრაობა: 5-საფ./წინა
ავზი/რეკ. საწვავი: 65 ლ/Super
სიგრძე/სიგანე/სიმაღლე: 4747/1778/1424 მმ
საბარგულის მოცულობა: 432 ლიტრი
წონა/ტვირთამწეობა: 1515/485 კგ
მოვლა: კბილანა ღვედი 140 000 კილომეტრის შემდეგ უნდა გამოცვალოთ
ძარა მოთუთიებულია, რის გამოც კოროზია თითქმის ვერ ეკარება. V6-ძრავიან ეგზემპლარებს კბილანა ღვედი ყოველ 140 000 კილომეტრზე (ან 6 წელიწადში ერთხელ) ეცვლებათ. კბილანა ღვედთან ერთად რეკომენდებულია თერმოსტატისა და წყლის ტუმბოს შეცვლაც, რაც ასევე არაა იაფი სიამოვნება. ასაკში ბენზინის ტუმბოც გამოდის მწყობრიდან და საკმაოდ ხშირია უკანა ელ. შუშების პრობლემებიც.
გენერატორი: აკუმულატორი დაჯდა? ეს უმეტესად დეფექტიანი დინამოს ბრალია ხოლმე
შუასადები: ცილინდრების ბლოკის თავის შუასადები V6-ძრავებში ხშირად იწვის. არც მისი გამოცვლაა იაფი
მაჩვენებელთა დაფა: ახალი ნაწილები აღარ იშოვება, შეკეთება მოგიწევთ
საბარგულის საკეტი: ვინც გასაღებს ხშირად ზედმეტად გადასწევს, მექანიკას მოკლავს
თერმოსტატი: თუ მწყობრიდან გამოვიდა, რაც ასევე ხშირი შემთხვევაა, გრძელი წრე დახურული დარჩება
კარდანის ლილვი: მოსახვევში ტკაცატკუციც ხშირია და ეს ლილვიც ძვირია
ალტერნატიული მეორადები
Alfa Romeo 156
ფასის დიაპაზონი: 700-დან 26 000 ევრომდე. გერმანიაში რეგისტრირებული ეგზემპლარები: 32 664
Peugeot 406
ფასის დიაპაზონი: 500-დან 7500 ევრომდე. გერმანიაში რეგისტრირებული ეგზემპლარები: 32 742
Saab 9-3
ფასის დიაპაზონი: 800-დან 17 000 ევრომდე. გერმანიაში რეგისტრირებული ეგზემპლარები: 42 249
