Volkswagen Touareg-ის პირველი თაობა, რომელიც 2002-2005 წლებში იწარმოებოდა, საქართველოში საკმაოდ მოთხოვნადი ავტომობილია. SUV-კლასის მეორადი ავტომობილი, რომელიც თავისი კომპლექტაციიდან გამომდინარე ძვირი ნამდვილად არ ღირს, ნამდვილად ღირებული შენაძენი იქნებოდა. ავტომობილი პირველ რიგში ყურადღებას იქცევს თავისი დახვეწილი გარეგნობით. ასევე მის ღირსებად შეიძლება ჩაითვალოს კომფორტი როგორც სალონში, ასევე სვლის დროს. ავტომობილი გამძლეობით დიდად არ გამოირჩევა, ასე რომ ყურადღების მიქცევა და მოფრთხილება აუცილებლად სჭირდება.

მფლობელები ძირითადად 4.2-ლიტრიან ბენზინის და 5.0-ლიტრიან დიზელის ძრავებს გვირჩევენ. რაც შეეხება პრობლემებს, ყველაზე ხშირად დაკიდების სისტემას (ავტომობილი ე.წ. ,,ბალიშებზეა“), ელექტროობას და ავტომატურ გადაცემათა კოლოფს უჩივიან.

Touareg-ის სერვისი იაფი ნამდვილად არ არის. მიუხედავად პოპულარობისა, ხშირ შემთხვევაში ხელოსანი არცთუ მისაღებ თანხას ითხოვს. რაც შეეხება ნაწილებს: აქაც იგივე პრობლემაა - ყველაფრის შოვნა შეიძლება, მაგრამ ძირითადად ძვირია.

რომ შევაჯამოთ, ეს ავტომობილი მათთვისაა, ვისაც შეუძლია ავტომობილის მოფრთხილება, დიდად საწვავის ხარჯზეც არ წუწუნებს და SUV-კლასის კომფორტული ავტომობილის შეძენა უნდა.