მეხუთე სერიის BMW (E39), იწარმოებოდა 1996-2003 წლებში და ერთ-ერთი ყველაზე პოპულარული ავტომობილია საქართველოში. საკმაოდ ლამაზი დიზაინით და გერმანული ხარისხით, ეს ავტომობილი მშვენიერი გადაწყვეტილებაა, თუკი მეორადი სედანის იაფად შეძენა გინდათ. მყუდრო, საკმაოდ მოცულობითი სალონი, კომფორტული სვლა და ეფექტური გარეგნობა, მანქანის ძირითადი ღირსებებია. ამ მოდელის მფლობელები გვირჩევენ 3.0; 2.8 ბენზინის და 3.0; 2.5 დიზელის ძრავებს. დიდი მოცულობის ძრავიანი(4.0; 4.4) მოდელები კი სასიამოვნოდ გაგაოცებთ თავისი აჩქარების უნარით და მანევრულობით.

თავისთავად არსებობს დაზიანებები, რომელიც დამახასიათებელია ამ მოდელისთვის. ავტომობილის მფლობელები ძირითადად სავალი ნაწილის სისუსტეს, გაგრილების სისტემას, საჭის ჰიდროგამანაწილებელს და ელექტროობის პრობლემებს ახსენებენ.
თუმცა ამ თაობის მეხუთე სერიის სერვისი საკმაოდ იაფია. ხელოსნებშიც დიდი პოპულარობით სარგებლობს და მეორადი ნაწილების შოვნაც ადვილია. ძირითადად, მეორადი და ახალი ნაწილების ფასებიც კი ხელმისაწვდომია.

მოკლედ რომ ვთქვათ, თუკი გსურთ შეიძინოთ მეორადი სედანი, რომელიც სიამოვნებას მოგანიჭებთ და არ იქნება მხოლოდ გადაადგილების საშუალება, მაშინ ამ თაობის მეხუთე სერია ერთ-ერთი საუკეთესო ვარიანტია.