შორ გზაზე წასვლამდე ავტომობილის შემოწმება აუცილებელია. ამისათვის მანქანის პროფილაქტიკაში მიყვანაა საჭირო, მაგრამ ვისაც ხელების დასვრის არ ეშინია, ამას თვითონაც შეძლებს.
რისი შემოწმებაა აუცილებელი?
ძრავის ზეთის, გაგრილების სისტემის, მინათმწმენდების სითხისა და აკუმულატორის შემოწმება ძალიან მარტივია და პრობლემას არც სითხეების დამატება წარმოადგენს. თუკი ავტომობილი „ზეთს ჭამს“, საკმარისი რაოდენობით აუცილებლად თან უნდა წაიღოთ. გაგრილების სისტემაში ანტიფრიზის არევა არაა რეკომენდებული.
სამუხრუჭე სითხის ნაკლებობის შემთხვევაში უმჯობესია, პროფილაქტიკას
საბურავები
►როცა ავტომობილი სრულად დატვირთულია, საბურავები მაქსიმალურად უნდა იყოს დაბერილი. არ დაგავიწყდეთ სათადარიგო საბურავის წნევის შემოწმებაც. ამასთან, საბურავების ზედაპირი ან გვერდები დაზიანებული არ უნდა იყოს. საბურავის პროტექტორის სიმაღლე მინიმუმ 2,5 მილიმეტრი მაინც უნდა იყოს.
► რაც შეეხება სათადარიგო ან სპეციალურ, ე.წ. სასწრაფო საბურავს: ის აბსოლუტურად კარგ მდგომარეობაში უნდა იყოს, რათა საჭიროების შემთხვევაში მართლაც უსაფრთხო იყოს მისი დაყენება. თუკი სათადარიგო საბურავის ასაკი 6 წელზე მეტია, მის გამოცვლაზე უნდა იფიქროთ. საქმე იმაშია, რომ გამოუყენებელი საბურავიც კი არ არის უსაფრთხო, თუკი მას ვადა გაუვიდა. ასე რომ, 6-7 წლის შემდეგ უხმარი საბურავიც კი უკვე ძველია. ყველა საბურავს აქვს 4-ნიშნა ე.წ. DOT-ნომერი გვერდებზე, რაც იმის საშუალებას იძლევა, რომ მისი ასაკი გაიგოთ. მაგალითად: ნომერი 1105 ნიშნავს იმას, რომ საბურავი 2005 წლის მე-11 კვირაშია (ან თვეში) წარმოებული.
განათება
► ჰალოგენის ნათურების გამოცვლა არცისე რთულია, განათების თანამედროვე საშუალებების (LED) შეცვლას კი ყოველთვის ვერ შეძლებთ - ასეთ შემთხვევაში სერვის ცენტრს უნდა მიმართოთ. რა თქმა უნდა, ყველა ნათურა უნდა მუშაობდეს - ცხადია, მოხვევის ციმციმებიც.
ზეთი
► არასდროს დაამატოთ იმდენი, რომ ნიშნულ მაქსიმუმზე ავიდეს - ძრავას ზედმეტი ზეთიც ავნებს. გამოიყენეთ მხოლოდ მწარმოებლის მიერ რეკომდენდებული ზეთი. თუ თქვენი ავტომობილი ზეთს იკლებს (ჭამს), აუცილებლად თან უნდა წაიღოთ ჩასამატებელი ზეთი და, საუკეთესო შემთხვევაში, სათადარიგო ზეთიც იდენტური სპეციფიკაციების მქონე უნდა იყოს იმ ზეთთან, რაც ბოლოს ჩაასხით.
► თუ ზეთის დონის შემოწმებისას გეჩვენებათ, რომ ზეთი ზედმეტად მუქი ფერისაა, ეს შესაძლოა იმის ნიშანი იყოს, რომ ძრავა გამართულად არ მუშაობს და წვა არ ხდება გეგმაზომიერად, ანაც ზეთი უკვე ძალიანაა დაძველებული. და თუ ეს ასეა, მაშინ ძალიან მალე ძრავის სერიოზული პრობლემა უკვე გარდაუვალი იქნება.
აკუმულატორი
► ავზების ასავსებად გამოიყენეთ მხოლოდ დემინერალიზებული ან გამოხდილი წყალი. კარგი იქნება, თუ დამუხტავთ კიდეც.
► რაც შეეხებათ ისეთ აკუმულატორებს, რომლებსაც სერვისი არ ჭირდებათ: ასეთ აკუმულატორებს უმეტესად სპეციალური პატარა ”ფანჯარა” აქვთ, რომელიც კონტროლის საშუალებას ფერების მაჩვენებლებით იძლევა.
გაგრილების სისტემა
► არ მოხსნათ თავსახური მაშინ, როცა ძრავა ცხელია. დაამატეთ მხოლოდ გამოხდილი წყალი ან ანტიფრიზი.
სამუხრუჭე სისტემა
► შვებულებაში გამგზავრების წინ ყველა მძღოლმა აუცილებლად უნდა შეამოწმოს სამუხრუჭე სისტემა და სამუხრუჭე სითხე. თუ სამუხრუჭე სითხის დონე მინიმუმს ჩასცდა, აუცილებლად უნდა დაამატოთ. მიუხედავად ყველაფრისა, სამუხრუჭე სითხე ყოველ სამ წელიწადში ერთხელ მაინც უნდა შეცვალოთ.
აალების სანთლები
► მცირე ზომის ყავისფერ შეფერილობას არა უშავს, მაგრამ თუ ჩაშავებულია, უნდა შეცვალოთ.
სოლისებრი ღვედი
► ზოგადად, კაპოტის ქვეშ სიტუაციის შეთვალიერება აუცილებელია. განსაკუთრებით ყურადღება უნდა მივაქციოთ სოლისებრ ღვედს (”კლინოვოი რემენს”), კაბელებს, შლანგებს. სოლისებრი ღვედი მაინც ყველაზე მეტ ყურადღებას იმსახურებს - იმიტომ, რომ იოლად წყდება. თუ წრიპინის ან ჭრიალის მსგავსი ხმა ისმის, ესე იგი გამოსაცვლელია.
მინათმწმენდები
► არ დაგავიწყდეთ მინათმწმენდების და იმ ავზის შემოწმება, საიდანაც საქარე მინა ირეცხება. ზაფხულში ზაფხულის შამპუნია საჭირო, რომელიც მწერებს და ხეებიდან ჩამონადენ სითხეს კარგად აშორებს.
მაჩვენებლები
► ყურადღება მიაქციეთ მაჩვენებელთა დაფას ან ეკრანს, სადაც ავტომობილი თვითონ გვამცნობს სხვადასხვა პრობლემების შესახებ. არასდროს გაუკეთოთ იგნორი რომელიმე მაჩვენებელს.