განსაკუთრებული მეორადი ავტომობილები

როგორ უნდა დაიპყროს მამაკაცმა ქალის გული? რომანტიკული ვახშმით, წითელი ვარდით და ასიათასი კომპლიმენტით? რა თქმა უნდა, მაგრამ ამ ყველაფერს, შესაძლოა, ერთმა პატარა, მაგრამ საყვარელმა ავტომობილმა აჯობოს. თუმცა ასეთი ავტომობილები მხოლოდ მანდილოსნებისთვის როდია განკუთვნილი. მაგალითად, „მინი კუპერზე“ ქალებს აბოდებთ, მაგრამ ამ მარკის მოდელები მამაკაცებშიც ძალიან პოპულარულია, რადგან „მინი“ კარგი მანევრირებით, აჩქარებით და სვლის სპორტული სტილით გამოირჩევა. ერთი სიტყვით, მთავარია, ავტომობილი სახასიათო, ასე ვთქვათ, რაღაცით გამორჩეული და განსაკუთრებული იყოს. თუმცა შარმმა არ უნდა დაგვაბრმავოს. ზოგიერთ „მაჩო-ავტომობილს“ სერიოზული მინუსები აქვს. წაიკითხეთ,

Daihatsu Trevis

ეს ავტომობილი (2006-2009) გარეგნულად ზომაში გაზრდილ ხუთკარიან „მინის“ ჰგავს, ტექნიკურად კი კუთხოვანი ფორმების მქონე Cuore-ს იდენტური და ზოგადად მასავით გამძლეა. სისუსტეები აღენიშნება სავალ ნაწილში - განსაკუთრებით უკანა ხიდზე. სწრაფად იცვითება შეჭიდებაც. ფასი: დაახლოებით 4 000 ევრო

New Mini

პირველმა თაობამ (2001-2006) გამოსვლისთანავე მანდილოსნების გულები დაიპყრო. რეტრო-დიზაინმა მოწონება დაიმსახურა. თუმცა New Mini-მ მექანიკოსების გულებიც დაიპყრო, რადგან ქალები ხშირად მიმართავდნენ შესაკეთებლად: ე.წ. Midland- Gear-კოლოფი (2004 წლამდე) ხშირად ფუჭდება, გამოცვლა კი 3000 ევრომდე

Citroen C3

სახურავის ფორმითა და მრგვალი ფორმებით C3-ის პირველი თაობის წარმომადგენელი (2002-2009) იხვს ჰგავს. ამ ავტომობილის მთავარი პლუსი ისაა, რომ ძარაზე კოროზიას იოლად არ იჭაჭანებს - ჟანგის პრობლემა თითქმის არ არსებობს. მთავარი სისუსტე ისევ და ისევ სავალი ნაწილიდან, კერძოდ, ხიდების ნაპირებიდან მოდის. ფასი: დაახლოებით 2 500 ევრო

Fiat 500

ცნობილი „ჩინკუეჩენტოს“ მორიგი თაობა რეტრო-სტილში 2007 წლიდან იყიდება. ახალი Fiat 500 განსაკუთრებით მანდილოსნებს შეუყვარდათ. არადა, ახალი თაობის „ჩინკუეჩენტოს“ არაერთი სისუსტე აღენიშნება. საბურავების თაღები და მაყუჩი იჟანგება, AUTO BILD-ის ხანგრძლივი ტესტის დროს კი ძრავა გაფუჭდა. ფასი: დაახლოებით 6 000 ევრო

Nissan Micra

„მიკრას“ მესამე თაობის წარმომადგენელსაც დათუნიას გამოხედვა აქვს. სხვათა შორის, ეს უკანასკნელი არა მარტო ამ სახით (2002-2010), არამედ კაბრიოლეტის ვერსიითაც იწარმოებოდა (2005-2009), რომელსაც Micra CC ეწოდებოდა. 1.2-ლიტრიანი ბენზინის ძრავის მქონე „მიკრას“ სუსტი ჯაჭვი ჰქონდა. რჩევა: გამოცვალეთ ყოველ 80 000 კილომეტრზე. ფასი: დაახლოებით 2 500 ევრო

Peugeot 1007

„პეჟოს“ სხვა მოდელებისგან განსხვავებით, ამ უკანასკნელზე ვერ ვიტყვით, საყვარელიაო, მაგრამ ფაქტია, რომ 1007-იც სახასიათო ავტომობილია. აბა, დააკვირდით: სხვა რომელ მცირელიტრაჟიანს აქვს გასაწევი კარები? ცუდი ის არის, რომ პრობლემები სწორედ კარის ამ მექანიზმებს ექმნება: ხშირად აღარ იღება, აღარ იკეტება, იყინება ან თავისით იღება. ფასი: დაახლოებით 3 500 ევრო

Smart Forfour

თანამედროვე სპორტულ ფეხსაცმელს ჰგავს: ჭრელია, მსუბუქია, სპორტულიცაა და ძვირად ფასობს. სწორედ მაღალი ფასის და ძვირადღირებული ოფციების „დამსახურება“ იყო ის, რომ ამ მოდელის წარმოება ორ წელიწადში შეწყდა (2004-2006). თუმცა Mitsubishi Colt-ის პლატფორმაზე აწყობილი ეს „სმარტი“ ნახმარ მდგომარეობაში იაფია და თანაც, გამძლე ტექნიკა აქვს. ფასი: დაახლოებით 3 500 ევროდან